Mesi vechi/Decembre
|
Edission original: |
Vittorio Gottardi, Mesi vechi, Treviso, Antonio Longo, 1883 |
|
Fonte: |
| ← Novembre | Edission e fonte ▼ |
DECEMBRE
Xe tornada la neve. Xe passai
I zorni, i mesi, come una saeta...
Cussì presto?.. Ma come?.. Come mai?.
E sentimo nel cuor quasi una streta.
Se gerimo a genaro radunai
In quatro, cinque amici a una ceneta:
Semo soli, a decembre, e sconfortai...
Xe i nostri amici in tera benedeta.
Pur, atorno el foghèr, la famegiola -
Sperando megio i dì che vegnarà -
Le lagreme se suga e se consola...
El destin de la vita xe sto qua: —
Spetar sempre cussì, sempre inganai,
Una felicità che no vien mai.