Pagina:Vittorio Gottardi - Mesi Vechi.djvu/51

Da Wikisource
Sta pagina la xe stà trascrita, ma la gà ancora da vegner rileta.

Xe tornada la neve. Xe passai
I zorni, i mesi, come una saeta...
Cussì presto?.. Ma come?.. Come mai?.
E sentimo nel cuor quasi una streta.

Se gerimo a genaro radunai
In quatro, cinque amici a una ceneta:
Semo soli, a decembre, e sconfortai...
Xe i nostri amici in tera benedeta.

Pur, atorno el foghèr, la famegiola -
Sperando megio i dì che vegnarà -
Le lagreme se suga e se consola...

El destin de la vita xe sto qua: —
Spetar sempre cussì, sempre inganai,
Una felicità che no vien mai.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Vittorio_Gottardi_-_Mesi_Vechi.djvu/51&oldid=69165"