Le Quatro Stagion/L'Autuno

by Anton Maria Lamberti

Le Quatro Stagion III. L'Autuno II. L'Istà IV. L'Inverno

Anton Maria Lamberti

Anton Maria Lamberti

Le Quatro Stagion

III. L'Autuno

XVIII secolo

Edission original:	Collezione delle migliori opere scritte in dialetto veneziano, Volume primo: Poesie di Anton Maria Lamberti, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817
Fonte:	Indice:Collezione delle migliori opere scritte in dialetto veneziano 1.djvu

←  II. L'Istà

Edission e fonte ▼

IV. L'Inverno  →

L'AUTUNNO

Nè ragazza, nè vechiòta,
    No grassona, ma grassota,
    Morachiota,
    Furbachiota,
    5Xe Toniota.
    La ga i ochi de carbon,
    La ga tuto el resto bon;
    La xe amiga, ma de cuor,
    La se ride de l'amor:
    10Per servirve no la sua,
    La ve tira zozo l'ua,
    La ve porta là de tuto,
    Pan, polenta, bon persuto,
    E vin duro e marzemin,
    15E la svoda el Canevin:
    La ga atorno dei puteli
    Tuti grassi e tuti beli;
    Co de l'ua la li contenta,

    E co un toco de polenta,
    20E depenta
    Nel so viso è l'abondanza
    Senza amor, senza jatanza:
    La xe franca, la xe schieta,
    La ghe stà a la barzeleta,
    25Dei bei prindesi la impronta:
    La xe cara co l'è ponta,
    La ve zonta
    Sempre el vin in tela tazza,
    E se sguazza,
    30E cressendo l'alegrìa
    Tuti ponti se va via.
        Pur tuti i tempi,
            Pur tuti i dì
            Sta cara Tognola
            35No xe cussì.
            La xe inzucada,
            La xe ingiazzada,
            La va pensando
            E sbadagiando
            40Senza inacorzerse
            De sbadagiar;
            La voria pianzerve
            No la 'l vol far;
            Ma inacorzendose
            45De sto difeto
            La core a sconderse,

            O la và in leto,
            E da un dì a l'altro
            No ghe xe altro,
            50E la ve sfiamega
            Come fa el Sol;
            La torna Tognola
            Tuti la vol.
            Come xe Tognola;
            55Cussì è l'Autuno,
            Che 'l corpo e l'anema
            Consola a ognuno.
No xe caldo, no xe fredo,
    Vedè tuto madurà,
    60No se vive più sul credo,
    Se tripudia e se ghe n'à.
        Chi va a la cazza,
            Chi va a folar,
            Chi 'l porco mazza,
            65Chi va a balar,
            Chi co una cocola
            Fa le brazzae,
            Chi osèla al rocolo,
            Chi fa matae,
                70Disnareti,
                Chiasseti,
                Spasseti,
                Prindeseti,
                Baseti,

                75Scherzeti
        Col goto in man
            De vin in man
            L'Amor se celebra,
            Ma no el tiran.
80Ma za de un velo
    Se coverze tuto el cielo;
    Fa frescoto,
    E la piova è qua deboto,
    Za le nuvole se sera,
    85E la piova casca in tera:
    Vigne, coli, campi e prai,
    No pol esser spassizai:
    Seu per questo desperai?
        Porco e fogheto
        90E un bon bichier,
        Polenta e in leto
        Co so mugier
Ve fa dolci anca sti zorni
    Benchè sie' stupidi e storni.
        95Ma la bora
            Dal Nord vien fora,
            Torna el Sol
            Che fa belo el pian e 'l col,
            E va via
            100Mal umor, malinconia,
            Sin che ariva co l'Inverno
            Neve e giazzo sempiterno.