Le Quatro Stagion/L'Istà
|
Edission original: |
Collezione delle migliori opere scritte in dialetto veneziano, Volume primo: Poesie di Anton Maria Lamberti, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 1.djvu |
| ← I. La Primavera | Edission e fonte ▼ | III. L'Autuno → |
Bei ochi, ma che fulmina
Se mai la fe' alterar,
Bei denti, ma che morsega
4Se mai la fe' arabiar.
Tempesta i slepi a refoli
Da quele bele man,
I afeti è capacissimi
8Da farve in cavruman.
La beca quanto un pulese,
La ruza da moscon,
La strepita, la pizzega,
12Ghe vien le convulsion.
Se mi vogio depenzerve
Quela che m'à strigà,
Ste cosse descrivendove
16Digo la verità;
E no gh'è al mondo un'anema
Che no me diga a mi:
Perchè co sto arcidiavolo
20Vustu passar i dì?
Se azonzo: l'ochio fulmina,
Ma spesso el xe seren,
E Amor svolazza e cocola
24L'ochio, el bel lavro, el sen;
Rabiada la ve morsega,
Ma in tuto el nostro amor
No xe arivà sta diavola
28Che a morsegarme el cuor.
Do slepi, a confessarvelo,
Do slepi ò ricevù;
Ma dolci afèti e lagreme
32Quanti no ghe n'ò bu?
L'è viva, l'è ardentissima
Co' Amor la fa impizzar,
Ma mi sto ardor teribile
36Procuro de schivar.
La beca, sì, la pizzega,
Ma ve conforta un miel
Che sin nel cuor s'insinua,
40Che drento no ga fiel.
Spaventa quanto s'agita
Quel viso in convulsion,
Ma gh'è i gran bei spetacoli
44In quela agitazion;
Ghe xe dei zorni critici
Ch'el belo pol rapir,
Ma da là un poco, un anzolo
48La torna a comparir.
Negri i cavei finissimi,
Azuro l'ochio e pien,
Brazzo robusto e morbido
52Colmo e diviso el sen,
Vivo e grosseto el lavero,
Denti d'avorio, e fià
Che senza droghe e aromati
56Xe sempre imbalsamà.
La tinta vivacissima
Ch'al brun tenta inclinar,
Figura che una Palade
60Farìa desmentegar.
Se voi' cussì depenzerla,
L'è ancora al natural,
E tuto xe verissimo,
64L'è Nina tal e qual.
E quei che disprezzandome
Da mato m'à tratà
Ariverìa a invidiarmela:
68Letor, cussì è l'Istà.
Toni, tempeste, fulmini;
Un ecesivo ardor,
Tavani, mosche, pulesi,
72E seco distrutor;
Ma sempre el ton no strepita,
De raro el va a ferir,
L'aria e l'ardor se mitiga,
76L'aguazzo sa vegnir;
E s'arde, se destermina
L'erbe e le biave el Sol,
Natura xe in disordine,
80L'Istà gnente ghe pol.
Ma i zorni serenissimi,
El caldo temperà,
L'ombre, i boscheti, i zefiri
84El ciel tuto stelà,
Le piove che ressussita,
Che xe a le piante un miel,
Le aurore, i bei crepuscoli
88Che ve depenze el ciel,
I fiori odoratissimi,
I fruti, l'erbe, el fien,
Le biave, i campi fertili...
92Scordeu tuto sto ben?
No: se ghe xe dei radeghi,
Se fiero xe l'Istà,
El pol ben compensarveli
96Se tanti beni el ga.