Giulieta e Romeo (1905)/Cavalcata de Romeo
|
Edission original: |
Berto Barbarani, Giulieta e Romeo, Milano, Luigi Ronchi, 1905 |
|
Fonte: |
| ← Confession de Giulieta | Edission e fonte ▼ | Note quarta → |
Col tempo in moto e el vento a tramontana,
piena la testa de bruti pensieri,
saltando fossi, par trovar sentieri,
che ghe scurta la strada mantovana...
pur de far presto e guadagnar ’na spana
de strada al tempo, se anca monti intieri
de sassi o giara, in volta se spampàna,
soto el pestar de la cavala sana,
de pelo bianco co i macioni neri...
Pur de far presto a sbusar via le sèse,
disturbando le cioche coi pulsini
e le putèle in mèso a le vanèse...
scavissando le rame,
spaventando le mame,
che ciapa in brasso tuti i so putini,
Romeo Montecio galopando va
de paese in paese,
verso le tore de la so cità!
— E l’era par sonar l’ave Maria
e tornava le pegore a la stala
carghe de lana e de malinconia!
Ma lu, pensando a quela çerta scala,
a quei ultimi basi a fior de nio,
a quei presentimenti che no fala,
el sigava a le done: Avìo sentìo,
che sia morta a Verona una putela
piassè bela de tute, anca de Dio?
E le done diseva: Paron mio,
se fusse vera che l’è morta èla,
fèmo orassion parchè la torna indrio...
E Romeo rispondea: Nissun difeto
la g’aveva, nè vissio, nè busia;
l'era inocente come un puteleto
e l’è morta così, par el dispeto
che no l’ho tolta insieme in compagnia;
mi son sta quel birbante maledeto.
— E l'era par sonar l’Avemaria,
e scominçiava le prime orassione,
quando ariva un corier de tuta bria...
“Done, piansì, che è morto Giulia, done...
e stamatina i l’ha portada via
co no so quante a drio mila persone
e tuti i frati de la frataria;
Metì lumini inante a le madone
e che i poareti desfamadi sia;
cantè Giulieta in mèso a le cansòne
de la vostra zentil malinconia...
Done, piansì, che è morto Giulia, done!„
Così, sicuro de la gran disgrassia,
palido in facia e desperà dal mal,
co i speroni piantà con mala grassia,
drento a la pansa del so bel caval,
col cor distruto, col çervel de fogo,
pronto a la morte e risoludo a tuto,
Romeo Montecio, galopando va
de logo in logo,
verso le tore de la so çità!...