Canzoneta
|
Edission original: |
Adolfo Gerani, Poesie veneziane, Venezia, C. Ferrari, 1903 |
|
Fonte: |
Indice:Gerani - Poesie veneziane, Venezia, Ferrari, 1903.pdf |
| ← Invido | Edission e fonte ▼ | In morte de Ricardo Selvatico → |
Andèmo, Zanze, vèstite,
Fà presto, zogia mia,
La barca xe infornia
De lumini e de fior.
Fa presto, zo, destrighite:
La note xe serena;
Varda, la luna piena
Sluse sul Redentor!
Fra vaporeti e gondole,
Fra bali, soni e canti,
Faremo come tanti
Là, in mezo a quel bacan...
Po' magnaremo in tola
Un piato de subioti,
Bagnà co quatro goti
De vin de Conegian.
Venezia par 'na femena
Tuta vestia de festa,
Co la girlanda in testa
Che la se va a sposar.
Xe de le feste l'unica
Del Redentor la Vegia,
La xe 'na maravegia
Venezia in mezo al mar!
Varda, co bela gondola!
Eco la Galegiante:
Sentimo sta cantante
Che canta el Trovator.
Senti co vose angelica,
Che vien zozo dal Çielo!
Zanze, vustu l'anelo?
Strènzime forte al cuor...
T’impirarò in-te l'asola
De fiori un bel mazzeto;
Vien col to be moreto
Che mor d'amor per ti.
Senza de ti, mia zogia,
La vita, no xe gnente;
Quando te so' da rente,
Zanze, no so' più mì.
Dame un baseto, làssime
Basar quel to bel viso...
Xe questo un Paradiso
Che in cielo nol ghe xe.
Viva Venezia, l'unica,
Bela çità divina!
El re de la cantina
Xe el vin de Conegian!
Venezia par 'na femena
Tuta vestìa de festa,
Co la girlanda in testa
Che la se va a sposar.
Xe de le feste l'unica
Del Redentor la Vegia,
La xe 'na maravegia
Venezia in mezo al mar!