Amor... baron
|
Edission original: |
Giuseppe D'Alpaos, Svoladine e refoli, Venezia, Fratelli Visentini, 1897 |
|
Fonte: |
Indice:D'Alpaos - Svoladine e refoli, Venezia, Visentini, 1897.pdf |
| ← Malinconie de un volontario in viagio per l'Africa | Edission e fonte ▼ | La me fazza sto piaçer! → |
I me conta che Amor xe un putelo
Tanto belo che mai se pol dir;
Che 'l xe caro, ma el xe un baronçelo
Nato a posta per farne sofrir!...
I m'à dito che tute le bele
Le lo porta co lore ogni dì...
Perchè el çerca le megio putele
Che contente ghe diga de si!...
E lu alora el se puza liziero
Fra le rose del viso e nel sen,
O el se specia ne i oci severo,
Provocante o ridente e seren!
Xe per questo che un zorno a una tosa
Che passada me xe da viçin..,
Co go visto i so lavri de rosa,
I bei oci, la man, el penin...,
Saltà adosso me xe a tradimento
Quel birbante e canagia de Amor
Che spiando za el stava el momento
De portarghe a la tosa el mio cuor!
Da quel zorno go perso la pase....
Da per tuto la vado a çercar,
Ma la tosa che tanto me piase
No gh'è caso che possa trovar!
Se, dormindo, mi in sogno la vedo...
Co me svegio me sento sbasir...
Me despero, la ciamo e no credo
Che 'l so cuor no me possa sentir!
Dove xeli quei lavri de rosa?
Dove xe quel viseto divin?
Dove xe quela zogia preziosa
Che incontrar me ga fato el destin?