Un'onta e una ponta/37
|
Edission original: |
Giovanni Cristofferi, Un'onta e una ponta, Venezia, Pellizzato, 1907 |
|
Fonte: |
Indice:Cristofferi - Un'onta e una ponta, Venezia, Pellizzato, 1907.pdf |
| ← 36 | Edission e fonte ▼ | 38 → |
- 37.
La perla vien da l'óstrega malada,
come dal cuor de nù la carità;
gema che no ga prezzo, se la dà
la man de una persona tribolada.
Chi sta in te l'ozio tuta la zornada
e no pensa al dimán come 'l sarà,
xe vera scciuma de la soçietà,
ma 'l bródo bòn stà in fondo a la stagnada!
Solo chi sofre e pena senza colpa
xe una creatura pronta al sacrifizio
e sa che sèmo tuti de una polpa.
Ma queli che regala i do soldeti
co' man distrata, fa coragio al vizio
e lassa in tera i veri povareti.