Sta note, àla sentio de vento che folade?
Xe vegnuda la neve, l’inverno è dei più crudi...
Po’, a basso, gàla visto co’ bianche xe le strade?
Gàla visto bambini calcarle coi piè nudi?...
Ela sta qua, Marchesa, in stanze riparade,
Avanti el camineto, coverta de veludi:
E la varda, tra i veri, la neve a calde ociade,
E la dixe con gusto: «i bei zorni è vegnudi.»
Ma su ne le sofite, ma zo nei sotoscala,
In sti zorni i pitochi più sofre e più se amala,
E i poeti più rusteghi deventa e i dixe ― sala! -
Putèi, no metè trapole, ne l’orto, ai oseleti!
Putèi, no butè neve in testa dei vecieti!
Siori, pensè che al fredo ghe xe tanti poareti.
