Casca le fogie. E cala soto tera
I veciereli e i zoveni malsani:
El ciel s’ha fato scuro e su la sera
Tira un’aria che ga cento malani...
De rondini vedè l'ultima schiera
Che svola e scampa ai lidi più lontani:
Ve pesa adosso una tristezza nera,
Un ignoto dolor ve ciapa ai pani.
I albari col vento ora i se lagna:
E el vento dixe storie che fa pena,
Mentre i siori poeti, dopo cena,
Canta el zalo squalor de la campagna,
Canta la fata che a la morte mena...
Tociando nel Barolo el pan de Spagna!
