De soto a le tirele, una vilana
Solèva i brazzi nudi ai graspi fati:
Fra i caveli ghe passa l’aria sana.
E ne la testa calcoli beati...
Eto, da drio le spale, a la lontana,
Se la magna coi ochi. No gh'è pati:
Più el la varda e più el sente la scalmana,
I caldi desideri dei tosati.
— El racolto de l’ua xe sta copioso...
Digo, voleu che femo sta monada?..
Me toressi vu, Bia, per vostro sposo?.. »
Tase la puta e in viso l’arossisse...
Ma la vida de fogie despogiada
I più ardenti struconi la tradisse.
