Se verze le finestre a l’aria bona,
E se varda d'intorno. Da un’altana
Sfuma el profilo d’una bela dona,
E se trema d’amor come una cana...
Vien a noia el lavoro ― e la fiacona
Vien, la celebre fiaca veneziana.
E se dixe che l’arte ne sbufona
E se buta i quaderni alla lontana,
Mentre i mussi, poarini, da le stale
Fa concorenza ai critici vilani,
Ai critici che stampa tante bale,
Le bale che se vende per vangelo,
Nei più grandi zornali italiani,
Scriti da qualche apostolo ciochelo!
