Pagina:Versi di Luigi Plet.djvu/55

Da Wikisource
Salta a ła navigasion Salta a ła riserca
Sta pagina la xe stà trascrita e rileta.


30

Quei fagoti, tacai là in t'un canton
     In botega de qualche formager,
     Ve par striche de legno o de carton...
     Mo comprèghene se volè saver
     Del nostro pesse cossa sia el più bon,
     Co' no mostrè avarizia nel conzier;
     Pele xe quei fagoti tacai là,
     E cordele chiamae de Bacalà.

31

Feme po sto piacer: considerè:
     In campagna, in cità, su i monti, al pian,
     Come l'aria, per tuto lu ghe xe;
     Tanto el se cata ancùo quanto diman;
     Vu lo tegnì in che logo che volè;
     Ghe podè sempre meter su le man;
     Pestè un branzin, l'è andà; ma lu, pestà,
     El mègio el fa sentir del Bacalà.

32

Son d'acordo co' vu che nol xe un fior
     Che se deva aver vogia de nasar;
     Ma d'altra parte mi no so che odor
     So celenza sturion possa vantar,
     Se ancora no ghe cala el vechio umor
     De voler tuti i pessi scavalcar.
     Forse, perchè su certe tole el va,
     Se crèdelo da più del 'Bacalà?'

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Versi_di_Luigi_Plet.djvu/55&oldid=65456"