Pagina:Versi di Luigi Plet.djvu/50

Da Wikisource
Vai alla navigazione Vai alla ricerca
Sta pagina la xe stà trascrita e rileta.


15

Capisso: vualtri cominciè a stupir;
     Quasi no lo credè sto so valor;
     Epur el mègio ancora l'ò da dir
     De quanto devo dir in so favor,
     Podendo in trenta modi comparir
     E sempre in t'una tola far furor;
     Dar scaco mato co' la so bontà
     A tute le piatanze el Bacalà.

16

El Cogo Piemontese, che per mi
     Xe libro degno de venerazion;
     Libro che studio sempre, note e dì,
     Per quel amor che porto a un bon bocon,
     Dise che se lo magno in sublissì,
     O pur a copietine col limon,
     Gusto una cossa che l'egual no ga,
     E che manda a le stele el Bacalà.

17

Lesso, in umido, rosto, e se se vol
     In quatro modi co' la salsa; e po
     Frito in tre altri; in pezzi, a mustachiol.
     In turbante, in adobo, co' l'inchiò,
     In carta, in tripa, revoltà... se pol
     Far in soma una lista, chè no so
     Se ghe sia chi pretenda aver magnà
     In tute le maniere el Bacalà.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Versi_di_Luigi_Plet.djvu/50&oldid=65451"