Santa. (assecondandola) Oh! no no, Signor benedeto...
Orazio. Ma no i li copa miga tuti, sala, come polastri! Ghe xe anzi de quei che se fortifica.
Santa. (accomodante) Sì, questo xe vero...
Alessandra. Ma mi no vogio saverghene, go dito. Mi vogio ch'el resta debole e ch'el me staga a casa.
Santa. E no se pol darghe torto...
Alessandra. Dopo tuto, so mi che me lo go fato.
Orazio. E alora la se lo conserva, cussì faremo un'Italia de vissole in composta!
Alessandra. Da resto, lu che discore tanto, anca so nevodo Gigi...
Orazio. El xe stà scartà purtropo! Ma nè lu, nè mi, nè nessun, ghe n'à colpa. Ossia, ghe n'à colpa quel maledeto martelo che, cascandoghe sul pie, ghe lo ga mezo rovinà... Altro che storie! (Si alza di malumore e rientra nella sua stanza)
Santa. Povareto, se sà... (sospira)
Alessandra. Ma, insoma, la xe stada anca una meza fortuna. (Con altro tono) Ben, la senta siora Santa, mi lasso che i diga, e se Sant'Antonio me fa la grazia ch'el mio Lalo resta libero, faremo una bela çeneta.
