Piero. Ciò, se sa che me piasaria megio lavorar in roba più fina...
Zaneto. In carte da mile forse?
Piero. No, ma in qualcossa che dàsse un fià de più sodisfazion...
Zaneto. Eh za! Perchè vualtri sè tanti ignoranti, pieni de ambizion ridicole, e no capì l'importanza del nostro mestier. El guadagno xe miserabile, purtropo, ma la scienza che s'impara qua dentro no i la insegna gnanca a l'università...
Piero. E che scienza saressela?
Zaneto. La scienza dela vita, dela qual mi so oramai professor.
Piero. (a mezza voce) Servitorsuo!
Zaneto. Le scarpe no le xe forse la base de l'omo? E no le xe lore che fa andar avanti l'umanità? (Prendendone qualcuna) Questi xe veri volumi de sapienza e più veci che i xe più se ghe trova materia da studiar. Da questi ti vedi la vita che uno conduse, la strada ch'el bate, el lavoro ch'el fa e, sora tuto, ti capissi da che gamba el va zoto! (Alzandosi e raccogliendo lo stivale che Pina aveva lanciato contro Piero) Eco, per esempio, sto stival, che xe roto sula ponta, no pol esser
