Zaneto. Adesso bisogna fornirse anca de salvatachi de goma, perchè la moda vol cussì. A cossa serveli po sti intrighi soto le scarpe?
Pina. Per parer più grandi.
Zaneto. Cara ela! I pataconi da çinque franchi, queli eh, xe salvatachi che fa deventar grandi dasseno! (Alle donne) Ma ancora qua sè? No volè andar via, corpo d'una toméra marza... O speteu che ve diga qualche bruta parola....?
Nana. Vien, vien Pina, che ancuo el ga una bruta zornada; se vede che nol ga gnancora tolto la perdonanza da l'osto...
Piero. (piano) Resta qua, Pineta, no badarghe...
Pina. (c. s.) Eh, lassa là, che deboto torno. (Esce a sinistra con la madre)
Zaneto. (guardando l'altarino) Senti eh, come ch'el s'ciochiza quela spia de lumin... Ga da esser l'ogio che adesso i ne missia co l'aqua! Eh za! semo a Venezia e l'aqua bisogna che la ghe entra dapertuto. Ma San Crespin protesta, ti vedi — come mi quando
