Giovani. Ma vorlo dir che no se faceva festa e baldoria?
Alessandra. Oh Madona adolorata! co tuti quei rádeghi e quei musi!
Orazio. No, lu esagera, ghe digo, e baldoria no se ghe ne faceva... La gera inveçe, questo si, una picola festa de beneficenza...
Alessandra. Cossa? (Gesti meravigliati di tutti)
Giovani. (sarcastico) Za! A benefiçio dei invitati!
Alessandra. Ma no: la gera per...
Anibale. (interrompendola) Va là, tasi ti, lassa ch'el parla lu adesso...
Orazio. Si, sior Giovani, la gera proprio a benefizio dei soldai amalai e ferii de l'ospeal, "Giacinto Galina" qua viçin 1.
Giovani. Caro lu, nol me vegna fora co Giacinto Galina, che questo no xe momento da comedie...
Orazio. El s'ingana anca qua! La comedia ghe entra da per tuto, caro sior Giovani, e le gran teste de Goldoni e de Galina no gavaria mai tanto trovà da lavorar come in sti tempi da tragedia!
Giovani. (impazientendosi) Ma insoma...
- ↑ Il palazzo della scuole, che ricorda il nome del grande commediografo veneztano, era stato convertito in ospedale militare.
