MORMORAZION
Ciò, varda quela rossa. Che la sia
'Na tosa de bon sesto? la ga un muso! —
Distu de quela là? Madona mia!
Un scheo; ma gnanca un scheo no meto suso.
Gala la vera in deo? Faghe la spia,
Dala curiosità squasi me bruso —
Sì, vecia, la la ga — Oh sacristia!
Quel omo, fia, ga fato un afar sbuso!
Dise el proverbio: «rossi dal mal pelo»
E i proverbi ti sa cossa che i val —
Che ociada! el so moroso che 'l sia quelo? —
Mi no ghe meto pevare, nè sal!
Fusselo po sto bogia almanco belo!
Basta! Taso parchè no voi dir mal. —
