EL SOGNO
Sta note m'ho insognà — Zioghemo al loto ! —
M'ò insognà la bon anema del prete
De San Fantin, don Anzolo Bartoto —
Morto resuscità quarantasete —
Go visto sangue in tera — Fa disdoto —
El gera co patìo! — Cossa se mete? —
De ben el ga bisogno; el gera zoto —
Salveve aneme sante e benedete! —
Che nuvolo de osei, Madona Santa! —
Trentanove! — Le strade gera piene —
Benon par la quaderna! anca el novanta.
Se rivemo a ciapar, orpo che çene!
Sta alegra! — Vecia mia, gnanca 'na sćianta! —
No 'l xe un bel sogno? — Sì, ma osei fa pene. —
