FRA VECI
Caro don Bepo — Oh, caro sior Giovani! —
Dove valo, el me conta — Vago a casa,
No bisogna scherzar, go setantani:
Qua, don Bepo, la man che ghe la basa.
Galo sentio che s'à bruzà do piani? —
Dove? — A Muran viçin de 'na fornasa
Semo proprio ridoti in bruti ani! —
Cossa ghe par, don Bepo? — El tasa, el tasa.
No gh'è timor di Dio, questo xe tuto! —
Qua lo voleva! — Infinamente in ciesa
Li go visti scherzar! Che mondo bruto! —
E sti suiçidi? — Vecio mio, ghe pesa
El castigo di Dio; eco el costruto! —
Basta! qua, femo el cambio de 'na presa. —
