NEGOZIANTE IN PICOLO
Qua done da San Rasmo i pomidoro,
Qua sarese, qua fragole a bon pato —
Ste fragole per quanto, el diga moro? —
Un francheto parona — Xelo mato? —
Ma la senta che odor, che 'l xe un ristoro —
Quel che 'l vol; ma anca un franco! — Xelo un stato? —
Ghe ne dago setanta — No, tesoro,
Le me costa più a mi, questo xe un fato —
Va ben quel che go dito e più no spendo —
Mora, la vegna qua, femo i novanta —
Ah che discorar tanto mi no intendo —
La vegna qua; ghe molela 'na sćianta?
Zo, femo otanta — Oh torno via corendo! —
Zo, zo, parchè i xe i primi, qua i setanta —
