SOLITA ANTIFONA
«Varda che ti sarà anca ti de quei,
(Me ga dito una voçe qua de drento)
Che morsegar se ga dovudo i dei
De aver molai quatro petessi al vento.
Ah metite le man in te i cavei!
No risćiarte sa, Grilo, in sto çimento;
I to canti no val proprio do schei,
Scoltime, Grilo, e ti sarà contento.
Ti faressi per çerto un afar sbuso;
Tuti, tuti sarà contro de ti
Se ti saltarà fora dal to buso.»
Mi go risposto: Li go in çesto mi;
Che mal ghe xe se meto fora el muso
E vegno a l'aria 'verta a far cri cri? —
