Pagina:Trieste vernacola.djvu/46

Tuto quanto ingobà, storto, ingranfio;¹
Per saludar el slonga el colo un mio,²
E tirando su e zo la capelina
Quindese volte el scassa³ la testina,
20Restando un'ora co la felpa⁴ in man
Come l'orbo ch'aspeta el carantan.
Co le zampe davanti a picolon,⁵
Tegnindose l'ombrela soto 'l brazzo,
El va zirando intorno a zopegon⁶
25Come chi tenta caminar sul giazzo,
E scoverzendo la zentil sirena
Par che 'l se storza el filo de la schena.
Tirando una carega⁷ al taolin,
A onza a onza el ghe se fa vicin;
30El ghe parla, el ghe ride, el la carezza,
El va in brodo de viole, el se imborezza,⁸
E quando la fa segno
D'andarsene, el xe là pronto a servirla,
A tegnirghe la borsa, a rivestirla,
35A meterghe la sciarpa sul scufioto,
A drezzarghe le pieghe sul daoto.⁹
E come, terminada la funzion,
El vescovo scortà dal capelan
Fra mile repetoni se la moca,¹⁰
40El nostro cavalier
Sporzendo 'l brazzo a la so dolce arpia
In tuta gloria el se la porta via.

1. ingranfio, ingranchito.
2. un mio, un miglio.
3. scassa, scuote.
4. la felpa, il cappello di feltro.
5. a picolon, penzoloni.
6. a zopegon, zoppicando.
7. carèga, sedia.
8. el se imborezza, va in zurlo, si ringalluzzisce.
9. sul daoto, sul didietro, scherzosamente.
10. fra mile repetoni se la moca, fra mille inchini, se la batte.