Vien putei a secar le tavernele,1
Buloti2 cole barbe negre e bionde,
Vien canaje, trufoni e manigoldi
A cavarve per forza fora i soldi.
. . . . . . . . . . . . . . . .
. . . . . . . . . . . . . . . .
. . . . . . . . . . . . . . . .
Un capelon ojà3 su una barbeta
Che ariva apena al c... dei più bassoti,
Fa ombrela a una figura schifoseta
Che par che zoga sempre ai bussoloti;
El ga po de brutezza un tal adobo
Che no capisso come no 'l sia gobo.
Mi credo che co crepa sta carogna
Va a nasser una lite maledeta
Fra Parma, Reggio, Modena e Bologna
Che tute insistarà che no 'l ghe speta,
Perchè no i vorà darghe sepoltura
A un cussì bruto mostro de natura.
I poveri veceti de una volta,
Stordidi de sta turba aventuriera,
Trovando che nissun quasi li ascolta,
Ghe par de far un sogno, una chimera,
Chè el comercio xe in man de babuini
Che ghe dà ascolto a tanti buratini.
. . . . . . . . . . . . . . . .
. . . . . . . . . . . . . . . .
. . . . . . . . . . . . . . . .
