Pagina:Trieste vernacola.djvu/34

DALLA « TERGESTEIDE »

. . . . . . . . . . . . . . . .
. . . . . . . . . . . . . . . .
. . . . . . . . . . . . . . . .
Stupisse e ghe ne parla tuti quanti
Cossa sia diventà sta nostra Borsa;
S'à cazzà drento un mucio de birbanti,
Capitadi ala cacia de risorsa,
Che tormenta ognidun, disturba e seca
E spedisse i mincioni per la Meca.

Ghe n'è vegnudi qua cola chitara,
Qualchedun cola Bibia soto 'l brazzo,
Ghe n'à manda un picheto da Ferara
Alfonso Duca e un altro Galeazzo,
Che à fato dela Borsa un Balaclava¹
Co i centomila omeni sbarcava.

Tuti quanti propone afari grassi,
A mile a mile i ga i napoleoni:
La venda, che doman ghe vien ribassi,
La ciapi do boreti² che i xe boni.
Xe lori che consiglia e che tanaja³
A far un zorno prima la fritaja.⁴

1. Balaclava, porto in Tauria (Crimea meridionale); nella guerra del 1854 stazione della flotta inglese.
2. do boreti, un po' di quattrini.
3. che tanaja, che attanagliano, che assillano.
4. la fritaja, la frittata.