XII.
Go preparado intanto una bandiera
Che seben che mi stago in quinto pian,
Se la calassi zo la toca tera;
Spero che 'l giorno no' sarà lontan....
Ma alora, voio farla mi, la guera,
Go de menarle un poco mi le man
Sul muso a qualche remo de galera
Che per salvarse se farà italian;
Regolaremo più de qualche conto,
Se trovaremo ben, amizi cari:
Vedarè che in quel giorno sarò pronto.
Un ano de galera, due, magari,
Ma me voio saldar; e senza sconto,
Voio che la partita la sia pari.
