Impinindo le zuche de bel canto;
Voi no lo conossè, no 'l vien mai fora,
El vivi fra le quinte, mi per questo
Un schizzo ve farò, ma 'ssai modesto.
Grassoto ma no tropo, ben portado;
Bon ocio, bon orecio e bon... palato;
Vestido a la moderna; petinado
A scartazzin;1 colar de pel de gato,
De baston e galosce2 sempre armado,
Pianista nè ben verde nè ben fato,
Ma praticon in tuti quei lavori,
Anca diriger l'opera, se ocori.
Oltre dei cori, primo suo elemento,
El ghe passa la parte ai comprimari;
In scena fermo lu no 'l sta un momento;
Col libro in man el cori drio i scenari;
El sona, el bati 'l tempo; el ghe sta 'tento
Che in batuda3 se movi i machinari,
Insoma, el fa de tuto, e a dirla franca,
Celebre no 'l sarà, ma guai se 'l manca.
