Pagina:Trieste vernacola.djvu/110

Da Wikisource
Jump to navigation Jump to search
Sta pagina la xe stà trascrita e rileta.
L'AMOR.


Cossa che xe l'amor? Signora mia,
'Sta quà, xe 'na domanda imbarazzante:
Su sto argomento, za Petrarca e Dante
Ga scrito dei volumi de poesia.

Una definizion? Ghe ne xe tante
Ma ogniduna ghe scondi una bugia.
L'amor, no se sa ben, cossa che 'l sia,
Se 'l sia un putin de oro, o 'l sia un birbante.

Per conto mio, l'amor, — che se intendemo,
Mi parlo dei amori de sta vita —
Xe, la più sana de le malatie,

E prima o dopo, tuti la gavemo.
Xe una parola, insoma, 'ssai pulita,
E che vol dir, un mar de sporcarie!

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Trieste_vernacola.djvu/110&oldid=65847"