CARLOTA ASCHIERI
(parla un vecio patriota)
I.
Se gh’era? altro che gh’era! Guarda quà
Sta cicatrice ’ndove i m'à ferì...
Ma no so stado fermo gnanca mi,
E che de gusto che me son sfogà!
. . . . . . . . . . . . . . . . . . . . . . . .
El quatro otobre ’riva al Podestà
La gran notissia che disèa così
Che l’Austria andava via! ’ndovina ti
El bacàn ch’emo fato quà in çità!
Fora bandiere bianche ― rosse ― verde,
Cocarde, piume, e nastri su i capèi;
No se perde un minuto, no se perde.
Ci ridéa, ci piansèa, ci se basava,
Siori e pitochi se parèa fradei...
E i suconi9 i cicava, se i cicava!
