Pagina:Spiere de Sol.djvu/18

Da Wikisource
Jump to navigation Jump to search
75%.svg
Sta pagina la xe stà trascrita, ma la gà ancora da vegner rileta.


CHE GO TANTO BISOGNO...

(viçin al balcon)


Ecote quà, bel sol pien de colori
che drento ti me vien a far la spia,
zo', scaldime sto cuor, svegia sti amori,
4che go tanto bisogno d'alegria...

E vu, tenari fiori profumai,
tuta beleza e tuta poesia,
Sù da bravi! cressè... cussì... indorai,
8che go tanto bisogno d'alegria...

E vualtri, oseleti piçenini
che sempre me voressi scampar via,
zighè forte, vegnime più viçini,
12che go tanto bisogno d'alegria...

Ah stagion bela, dura tuto l'ano!...
fame sognar, o Primavera mia;
co ti, nel cor me sparirà l'afano
16e... chissà che me torna l'alegria...

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Spiere_de_Sol.djvu/18&oldid=65310"