Se manco mal al mondo ti vol star,
Impara quatro cosse, e gnente più,
Da mi che, arente del saver vogar,
4In pratica del mondo son vegnù.
Tiò sempre legne vechie da brusar,
E legne verde no butar mai sù;
Lezi dei libri vechi, e lassa andar
8Tanti moderni fiori de vertù.
No digo che ti bevi tropo vin;
Ma có ti gà de vin necessità,
11Bevi sempre del bon vechio corbin.
Strensi de amici vechi società,
Ascoltili, e, co tuto el só morbin,
14Manda i zoveni a star de là de Strà.
Un zorno se lagnava un barcariol,
Con un altro più vechio, del destin;
E el ghe zurava da povero fiol,
4Che el vorave esser morto da bambin.
E respondeva el vechio: Có se tiol
Tuto al pezo, se fà un cativo fin:
Filosofia, filosofia ghe vol;
8No ghe xè omo che no sia meschin.
Tuto quel che dixè vero sarà,
Replicava el più zovene; ma el dir
11No xè remedio per un desperà.
Sì, dise st'altro, quando el fa capir
Che xè cussì per l'omo decretà:
14Nasser, soffrir, far nasser e morir.
