Soto i balconi de la só Mariela
Cussì cantava Nane barcariol,
Una note de istae serena e bela,
4Chè, gramo! inamorao dormir nol pol:
Del cielo no ghe xè sconta una stela,
Ma de tute le stele manca el sol;
Manca la maravegia, la zemela
8Del bambin che de Venere xè fiol.
Onde fate al balcon, chè Nane aspeta,
O Mariela, bonazza del mio cuor,
11Del mio pensier segonda benedeta.
So quà, de la mia barca servitor,
Respondeva Mariela in canzoneta;
14So quà, remo che voga in tel mio amor.
Tì fra le strage e i stenti de la guera, (*)
De nobile suor bagnando el fronte,
Voltà sempre col cuor a sta tó tera,
4E a mì, che son de le tó brame el fonte;
E mì quà sola da matina a sera,
Col pianto sempre ai ochi e le man zonte,
Col cuor de là dal mar, col cuor che spera,
8Perchè l'amor gà le lusinghe pronte.
Ah! nò, tesoro mio, nò, no se diga
Che Lucia, ardendo de una fiama pura,
11No divida co tì rischio e fadiga.
Sarò soldà: co anema secura
Dei tó nemici me farò nemiga;
14Chè dove ghe xè amor, no ghè paura.
