Se ti vol far el barcariol ascolta
Come ti gà da dover star in pope,
Chè questo xè un mestier che esige molta
4Vera bravura, e chiacole no trope.
Stà in pope con un'aria disinvolta,
Ma dreto e serio quanto un re de cope;
E se fa vento o giazzo qualche volta,
8No aver paura de perder le stope.
Conossi ben de l'aqua el ponto, el fero
Varda de la tó barca, e la vogada
11Destendi, senza pressa, e a remo intiero.
Senza voltarte va per la tó strada,
Dighe colega a Toni, a Nane, a Piero,
14Chiama barca, e dà a tempo la siada.
Mio sior pare, bon'anema, vogava
Un certo zentilomo venezian;
E có lù gera in pope, el me sentava
4In sentina, da lù poco lontan.
Per cossa, qualchedun ghe domandava,
Tegniu là quel putelo? E lù: El guardian
Cussì ghe fazzo; e dopo el replicava:
8Cussì el me vede a guadagnarghe el pan.
Adesso che anca mi so pare, e vechio,
Cognosso che ghe xè la só rason,
11Che un bon pare ai só fioi serva de spechio.
Che se gà da tegnirli in sugizion;
E che chi vol pien tirar suso el sechio,
14Gà da unir a la forza l'atenzion.
