Pasq. Ostaria, siora Cate, vu no podaressi spetar st'altra setimana?
Cate. Seu mato o ghe deventeu? Ma, un'altra bela idea! (prendendo l'orologio) De sto relogio i me pol dar un napoton; pardiana, el lo ga da valer in man d'un ladro! Benon. Benon. Mezo ghe lo dago a Piero, e mezo me lo tegno mi, ve piase?
Pasq. Sì, sì, benon, benon.
Cate. Digo, e se vostro barba se ne acorze?
Pasq. Gnente paura, ghe dirò che i me lo ga robà!
Cate. Bravo, disèghe che sè sta in piazza, in mezo a la fola, e che là, i và fato la fatura.
Pasq. (allegro). E vu, Cate, disèghe ben a Piero!
Cate. No stè pensar, vedarè che par sta sera se giusta tuto.
Pasq. Cara quela Cate!
Cate. Digo, Pasqualin, adesso vu feme el servizio che m'avè promesso, andè fora e tolème qualcosseta da disnar, parchè deboto xe qua Bepo.
Pasq. Cossa voleu che toga?
Cate. Tolème una lira de risi, una lira de castrà da far in umido, do onzete de butiro, e un pèr de sèole, co' un pugneto de parsemolo.
Pasq. Deme i soldi che coro.
Cate. Ciapè ste quatro palanche.
Pasq. Bàstele?
Cate. No gavè un cavur in scarsela? Se no le basta, zontèghe, che ve darò.
Pasq. Va ben.
Cate. Fè presto, e vardè che no i ve daga tanti ossi. Corè, corè.
Pasq. (saltando). Digo, un pùlese ancuo no salta come mi. A revèdarse. (parte correndo).
