DOPO E PRIMA.
Se te vardo ti me ridi,
Nè più el viso ti te scondi,
Se te ciamo ti rispondi.
So qua vissere co’ ti.
Ti xe bela più de prima,
Ti xe sempre la mia zogia,
T'indovini ogni mia vogia,
Ti me disi sempre sì;
E pur varda se più grando
Se pol dar de sto strambesso,
Mi me par che giusto adesso
Ti me vogi manco ben.
E me crussio e me tormento
Nel pensarme che oramai
Quei bei tempi xe passai,
Quei bei zorni più no vien,
Quei bei zorni, zogia mia,
Che incontrandose coi oci,
Me ricordo che i zenoci
Ne tremava a tuti do.
Quei bei zorni che: no vogio,
Ti disevi tuta rossa,
E mi a ti: mo’ via percossa?
E ti a mi: perchè de no!
