Giov. (a Teresa). Gala sentio? Cossa gaveva dito? Xela gnanca un anzolo!
Ter. (baciandola commossa). Va là, ciapa un baso, che in paradiso ghe n'è co' manco meriti! (si asciuga gli occhi) (p. p. a Giovanna). No, no la staga a disturbarse.
Giov. La lassa che l'acompagna; za go da andar un momento in cusina anca mi. (piano a Teresa). E cussì, come la gala trovada?
Ter. Mi ghe digo la verità che son proprio contenta. Oh Dio... se sà che la xe un poco palideta, un poco debole, ma le xe cosse che passa.
Giov. Basta! Ma quelo che tremo, xe che la possa tornar indrio... perchè el dotor m'à dito che ghe ocoraria un sito quieto, tranquilo, senza la più picola emozion. Oh Dio... malatie de cuor, se sa ben!
Ter. Andemo; adesso no la vada a pensar a ste robe. Intanto ciapèmo el ben, che al mal ghe xe sempre tempo.
Emma. (quando sono usciti, andando a sedere). Finalmente semo sole!
Ad. Cossa gastu?
Emma. Sèro ste porte, perchè no vegna nissun a disturbarne.
