Orsolina (continuando a parlare con Giacomo,
che non si ferma mai dallo scrivere)
De sti copioni, no se ciapa gnente?
Giacomo
Dodese franchi l'un, ma li go avudi anticipadi, e te li go dai gieri!
Orsolina
Alora ti dovaressi meterte a copiar de l'altra roba! No xe questo el momento de lavorar per gnente! Ciò, varda che go dovesto tor altri 30 franchi dei 275 messi da parte per la cambial!
Giacomo (sempre scrivendo)
La cambial la xe de 600, l'aconto no basterà più, e gaveremo un protesto!
Orsolina
Perchè no ti xe bon de alzar la vose, de farte rispettar! El Gallizioli, de S. Tomìo, el m'ha fermà per la strada... vilanazzo!... El vol almanco 100 franchi. Mi tento de farlo taser con 30; ma quando el vien go paura che el me se meta a zigar! Se almanco vegnisse la cameriera nova, ghe li faria dar da ela, e no me lassaria vedar!
