Doralice
Xe festa e so stada a messa!
Orsolina
La messa va benissimo, ma el primo fondamento de tute le religion, xe quelo de darse una man scambievolmente! «Quando ocora».
Temistocle
(indicando il lume acceso alla Madonna)
A ela invece ghe basta fruar tuto l'ogio de la salata, «per le so madone»
Aida
Perchè la madona ghe fassa la grazia de sposar el so sergente De Nobile!
Doralice
Xe tropo! Xe tropo! (piange)
Orsolina
Finiamola! «Certi scherzi no i me piase». No xe belo sto parlar de morosi. No xe decente! Se vostra sorela la ga de la religion, la fa benissimo. (a Doralice) Per altro, se ti comprassi l'ogio coi to bezzi, la divozion la saria più completa!
Doralice
Vardè che no xe el vostro ogio che brusa, ma le mie candele.
