che gabia do dei soltanto de «come se deve» no la se permete de andar sola fora de casa! (a Giacomo che scrive) Disi qualcosa anca ti, quando se trata de la moral! (a Carolina) E ela no la staga a slongar le recie! Questo xe un altro difeto che la Clotilde no la gaveva!
Io non ascoltavo signora padrona! Terminavo di pulire le scarpe delle signorine! (Doralice v. v.)
E meno toscanesimo, che in casa mia la ga da abituarse a parlar ciaro! E la vaga a pareciarme l'acqua del semicupio! che quando pago una serva, e quando la pago come una cameriera, el mio bagno, almanco, gavarò dirito de farlo! (Carolina v. v.; a Giacomo) No, no! quela no la xe fata per la nostra casa. Intanto! Ste paesane le xe tute sporche. Gastu visto? Per no incomodarse no la vol gnanca che mi fassa el mio bagno!... (alzando la voce contro Doralice) Ma Doralice! No se impianta so mare in sta maniera, quando la sta fasendoghe delle giuste correzion!
