Per esser desnuao, e no son degno
De domandarne una gracieta,
Che cho ve vardo, resto com'un legno.
Son tanto creatura simpliceta
Come un'agnelo bon, e mansueto,
Si ben me mettessè una borseta.
Son Caurlese un poco liquidetto,
Dormo, camino, corro, ne me muovo,
Son senza fiao, e trazo qualche peto.
Son vecchio, e si n'ho fatto anchora un vuovo,
Son senza lengua, e da paura crio,
Come si fosse in bocca de un lovo.
Son sforzao al mio mal andarghe drio,
Onde besogna sempre suspirar,
E no so si sia d'altri, nianche mio.
Son su la porta, e si no posso intrar,
Ho'l desiderio in man, me manca'l seno,
E da vergogna, e scovegno schitar.
Son cargo d'allegrezze, tandem peno,
Ch'un viso è quel, che me fa andar strazzoso,
Ni no reposo, e sempre me remeno.
Son neto ,si no fosse mocignoso,
No n'ho muande, e si no mostro niente,
Ma la mia sorte, si me tien bavoso,
Onde no posso andar infra la zente.
