EL CODON
Mi so che prima del quarantaoto
Se stava in pase e se viveva ben:
Co pochi soldi se beveva el goto,
Co do zvanzeghe al zorno geri pien.
Adesso invece andemo sempre soto,
Le cedole ne va come le vien:
Continuando ogni poco de sto troto,
Dio no lo vogia, magnaremo fien.
E tuto causa quei che vive a scroco,
Causa sti desperai de framassoni
Che ciga: Luse al popolo panduro!
Mi son vecio e i me buzara de poco;
Ma so da l'esperienza che i caponi,
Per ingrassarli, se li tien a scuro.
