Pagina:Rime in dialetto veneto di Polifemo Acca.djvu/83

EL VERO SISTEMA

     Se la Morte spassiza in farmacia,
Se i medici ve mazza a bon mercà,
E i ve squarta, e i ve fa l'anatomia
Per dirve ciaro come sè crepà;
     I quatro schei¹ che ve gavè ingrumà,
Spüar fora dovè per malatia:
No saria megio far la carità,
O intavolarli al ziogo o a l'osteria?
     Fè come mi che no voi tor mai gnente;
Che a sessant’ani cavo un do de peto;
So forte in gamba e no me bala un dente.
     Ma che consulti, che medicinai!
Un lavativo d'aqua fresca, e leto:
No xeli tuti soldi sparagnai?

1. Centesimi.