Pagina:Rime in dialetto veneto di Polifemo Acca.djvu/74

Da Wikisource
Sta pagina la xe stà trascrita, ma la gà ancora da vegner rileta.
EL MATERIALON


     Vado co le mie femene in Arquà
Per visitar la casa de quel tal
Canonico bislaco, original,
Che Laura e sempre Laura n'à cantà.
     No trovo che un scritorio e un caramal,
La so poltrona e un gato imbalsemà;
E dopo un'ora che me son secà,
Vegno via, posso dir, come un stival.
     I me conta che i omeni più fini
Varda quele cagnere co respeto
E a peso d'oro le voria comprar:
     Mi digo che i xe mati da ligar;
Corpo de bio, ma se i le porta in gheto,
Chi diavolo ghe dà cinque fiorini?

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Rime_in_dialetto_veneto_di_Polifemo_Acca.djvu/74&oldid=71224"