EL SISTEMATICO
Dignitoso, pulito, compassà
E delicato come una doneta,
No vogio roba che no sia perfeta
E conto quanti risi go magnà
Vado in ufizio co la mia fiacheta;
Fin l'ultimo minuto resto là;
Come un specio xe lustro el mio mezà,
E senza pieghe xe la mia giacheta.
Se fazzo el mio zireto a l’Aquedoto,
Scometaria che un bovolo me ciapa;
Se vado in biraria, me porto el goto.
Son prudente, pacifico, bigoto,
Ma preferisso el fulmine del papa
A una macia de seo sora el capoto.
