Pagina:Rime in dialetto veneto di Polifemo Acca.djvu/61

LA STRIGA GALANTE.

     Sta zingana più negra del carbon,
Più sutila d'un scheletro d’ombrela,
Che mena a pascolar la so vedela
O va sola de note a sdrondenon,
     Zogando a Ciara mata sul balcon,
La ve se buta da sta banda o quela,
La cuca e ride, la ve fa la bela
Voltizando¹ col naso a peveron.
     Mi no ve digo ch’una cossa sola:
Che son goloso, e no fenisso mai
De curar fin a l'osso la brisiola;
     Ma se i me da una quagia tropo frola,
Una renga, o un paneto da soldai,
Vardo se ghe xe 'l can soto la tola.

1. Girando qua e là.