LA VERSOMANIA
Lezè i scritori classici latini
A scomenzar dal secolo più basso;
Lezè Dante, Petrarca, Ariosto e Tasso,
Alfieri e Monti, Foscolo e Parini:
E veneti e lombardi e fiorentini,
E tuti quei ch’al mondo à fato ciasso;
Comenteli un per un, passo per passo,
E caveghene fora i latesini.1
Sgobè come una bestia da strapazzo,
Tuto per starghe drio desmenteghè:
Ligheve a taolin co la caena;
Se no sè nati co un tantin de vena,
Ve garantisso mi che no farè
Che un mar de versi co tre dei de giazzo.
- ↑ Animelle.
