GIUDA
Eco Scariòt che sogna el tradimento
E se desmissia co la borsa in man;
Ma Satana lo guanta in quel momento
Cigando: So qua mi, razza de can.
Giuda ghe sbrissa via pien de spavento,
Fra le zate lassandoghe 'l pastran,
E cento cale traversando e cento
El se fica ne l’orto del piovan.
Meterse 'l lazzo sora un gran figher
E cascar zoso come un pero gnoco,
Xe la storia d’un lampo, d'un pensier;
Ma ’l diavolo più forca e più lizier,
Rompe co i denti a la cravata el fioco
E ghe mete un cordon da cavalier.
