Pagina:Rime in dialetto veneto di Polifemo Acca.djvu/103

AL PALAZZO DUCAL

     Chi diavolo avarà d’esaminar
Tuti sti dosi, sti guerieri e santi?
Cossa voleu che possa interessar
Ste buzare a nualtri negozianti?
     Se podarave tor, come fa tanti,
Un ciceron che sapia sbatolar:
Lu ne la conta, e nu passemo avanti
Insina che vien l’ora de disnar.
     Ne mòstrelo el famoso mapamondo?...¹
No merita fermarse a strolegar:
Me basta vèder se l'è quadro o tondo,
     Semo a le quatro Porte?² Ca de dia!
Mi che no voi lassarme infenociar
Vardo se le xe quatro e tiro via.

1. Di Fra Mauro.
2. La sala dalle Quattro Porte, con dipinti di Tiziano, del Caliari, ecc.