Pagina:Raccolta poesie veneziane dell'autore dei Capricci poetici nello stesso dialetto 2.djvu/87

Sta pagina la xe stà trascrita, ma la gà ancora da vegner rileta.

PER LE COSPICUE NOZZE K - Y

DEDICA AL MARCHESE X

Dialogo fra chi ordina el Sonetto,

e chi lo ha da scriver ¹.

Devotissimo servo. — Oh benedetto!
     Una grazia vorave? — Al so comando;
     Per matrimonio mi voria un Sonetto:
     La servirò, basta saver per quando.
Fra mezz'ora el me preme. — Povaretto
     No la sa che l'intrigo è troppo grando?...
     Oh ma de diana, questo xe un soggetto
     Ch'el se tratta, la scusi, anca cantando.
Quattordese versetti, e xe finio.
     Semo d'accordo, ma per questo apponto
     Un impegno maggior deventa el mio.
Ma vedo che ghe n'è dodese in ponto!...
     Sì signor, e anzi el tredese vien drio,
     Ghen dago un altro, e cussì saldo el conto.
                                        Cussì la xe servio,
     E in manco de mezz'ora ecco el Sonetto
     Co quattordese versi, e 'l so tocchetto.

↑ Allude l'Autor co sto scherzo alla facilità de ordinar e de pretender dei versi per matrimonio. Propone sto Sonetto a modello, per sparagno de adulazion, e de qualche miera de busie in sti tali troppo frequenti incontri.

[1] Allude l'Autor co sto scherzo alla facilità de ordinar e de pretender dei versi per matrimonio. Propone sto Sonetto a modello, per sparagno de adulazion, e de qualche miera de busie in sti tali troppo frequenti incontri.

1